MTANZANIA

Jeshi la Polisi mkoani Mwanza limewakamata waganga wa kienyeji 55 wakiwa na viungo vya binadamu vikiwamo meno na nywele vinavyodaiwa kuwa ni vya watu wenye albino.

Vitu vingine walivyokutwa navyo ni ngozi ya simba, nyumbu, mamba, vibuyu, njuga, vioo, shanga na debe tatu za bangi.

Akizungumza na waandishi wa habari jana, Kamanda wa Polisi Mkoa wa Mwanza, Valentino Mlowola, alisema waganga hao walikamatwa katika wilaya za Mkoa wa Mwanza kwenye msako ulioanza juzi.

Alisema katika msako huo wamefanikiwa kuwakamata waganga hao wanaodaiwa kupiga ramli chonganishi zinazosababisha kuchochea matukio ya mauaji kwa albino na vikongwe.

“Katika msako wa Jeshi la Polisi ulioanza juzi tumefanikiwa kuwatia mbaroni waganga wa jadi 55 ambapo kati yao tumewakuta na nywele, meno za watu wenye albino waliouawa katika matukio tofauti mkoani hapa,” Mlowala.

Kamanda huyo wa Polisi alisema waganga hao watafikishwa mahakamani kujibu tuhuma zinazowakabili ikiwamo kumiliki nyara za Serikali kinyume cha sheria pamoja na viungo vya binadamu.

Mbali na tukio hilo, taarifa kutoka wilayani Misungwi zinaeleza kuwa watu wanne wamefikishwa kortini mjini hapa kwa tuhuma za kuuza mafuta maalumu ya ngozi yanayotumiwa na watu wenye albino.

Mafuta hayo yenye thamani ya Sh milioni tano, ambayo yalitolewa na Hospitali ya Bugando kwa watoto wenye albino wilayani humo.

MTANZANIA

Jeshi la Polisi Kanda Maalumu ya Dar es Salaam jana lilimuhoji Katibu Mkuu wa Chama cha Demokrasia na Maendeleo (CHADEMA), Dk.Willibrod Slaa, kwa zaidi ya saa sita kuhusiana na tuhuma za mauaji dhidi yake.

Hilo limetokea siku moja baada ya mlinzi binafsi wa Dk. Slaa, Khalid Kagenzi, kueleza jinsi alivyoteswa na walinzi wa Chadema na hata kumuhusisha na tishio la mauaji ya kiongozi huyo.

Dk.Slaa alihojiwa katika Kituo Kikuu cha Polisi Dar es Salaam jana kuanzia saa 4.00 asubuhi hadi saa 10.00 jioni huku akiwa amefuatana na mawakili watatu wa chama hicho wakiongozwa na Makamu Mwenyekiti wa Chadema, Prof. Abdalla Safari. Wengine ni Nyaronyo Kicheere na John Mallya.

Alipofika kituoni hapo, Katibu Mkuu huyo wa Chadema aliingia moja kwa moja katika chumba maalumu na kuhojiwa na askari wa upelelezi ikiwamo kuchukuliwa maelezo ya kina kuhusu jinsi anavyolitambua tukio hilo.

Wakati akihojiwa na polisi, Dk. Slaa alikuwa akiongozwa na wanasheria wa Chadema ambao muda wote walikuwa wakisikiliza mahojiano hayo kati ya polisi na kiongozi huyo.

Mahojiano yalipokuwa yakiendelea ndani, nje ya jengo la polisi walionekana viongozi mbalimbali wa Chadema wakizunguka, huku wengine wakiingia ndani na kutoka.

“Ndani kuna mahojiano ya kawaida na anaeleza mazingira ya namna alivyotaka kuuawa… hivyo anaandika maaelezo ya kile anachokijua yeye,”  Safari.

Baada ya mahojiano hayo ilipofika saa 9:40 jioni, Dk. Slaa alitoka ndani kiwa na wanasheria John Malya na Nyaronyo Kicheere na kuzungumza na waandishi wa habari juu ya mahojiano yake na polisi.

Alisema utaratibu wa kuandika malalamiko katika sheria ni kawaida kwa kuwa pande zote zinapaswa kutoa taarifa za nini wanakifahamu kuhusu tukio lolote.

MWANANCHI

Jukwaa la Wakristo Tanzania limewataka waumini wake kujiandikisha kwa wingi katika Daftari la Kudumu la Wapigakura, kuisoma Katiba Inayopendekezwa na kujitokeza kuikataa kwa kupiga kura ya “hapana”.

Taarifa iliyotolewa na Jukwaa hilo jana na kusainiwa na mwenyekiti wa Jumuiya ya Kikristo Tanzania (CCT), Askofu Dk Alex Malasusa, mwenyekiti wa Baraza la Maaskofu wa Kanisa Katoliki Tanzania (TEC), Askofu Tarcisius Ngalalekumtwa na mwenyekiti wa Kanisa la Pentekoste Tanzania (CPCT), Askofu Daniel Awet, imetaja sababu mbili za uamuzi wake kuwa ni muswada wa Mahakama ya Kadhi kukiuka misingi ya Taifa kuwa na Serikali isiyo na dini, na Kura ya Maoni kusababisha mgawanyiko.

“Hivyo basi, Jukwaa linawataka waumini wake wote wajitokeze kwa wingi kujiandikisha katika Daftari la Kudumu la Wapiga Kura, waisome Katiba Inayopendekezwa na kushiriki kikamilifu vipindi vya elimu juu ya Katiba Inayopendekezwa na kisha wajitokeze kwa wingi kupiga kura ya hapana kwa Katiba Inayopendekezwa kwa sababu zilizotajwa hapo juu,” linasema tamko hilo la kurasa nne.

Taarifa hiyo imekuja siku moja tu baada ya Waziri Mkuu Mizengo Pinda kutangaza kuwa muswada wa uanzishwaji wa Mahakama ya Kadhi uliokuwa umeondolewa kwenye mkutano uliopita wa Bunge kwa ajili ya mashauriano zaidi, utawasilishwa katika vikao vya chombo hicho vinavyoanza Jumanne ijayo baada ya kufikiwa kwa maridhiano baina ya viongozi mbalimbali wa dini.

Pia tamko hilo limekuja siku chache baada ya Rais Jakaya Kikwete kuiagiza Hazina itoe fedha kwa Tume ya Uchaguzi (NEC) kwa kadri inavyohitaji ili kuiwezesha kukamilisha mchakato wa Kura ya Maoni.

Viongozi wa Jukwaa la Wakristo walikutana Machi 10, mwaka huu kujadili kwa kina kuhusu hali ya usalama wa nchi ilivyo sasa na mustakabali wake, Katiba inayopendekezwa na uanzishaji wa Mahakama ya Kadhi.

MWANACHI

Idadi ya watu waliofariki dunia katika ajali ya Basi la Majinjah imeongezeka na kufikia 50.

Mkuu wa Mkoa wa Iringa, Amina Masenza alisema maiti zilizotambuliwa na zile zilizobakia, walipohesabu waligundua idadi yao kufikia 50.

“Tumebaini kuwa maiti katika ajali ile zimefikia 50 baada ya kuhesabu vizuri zile zilizotambuliwa na ambazo bado hazijatambuliwa hadi sasa,” Masenza.

Awali, Mganga Mkuu wa Mkoa wa Iringa, Robert Salim alisema majeruhi waliopokewa hospitali hapo walikuwa tisa na mmoja ndiye amefariki dunia.

Alisema majeruhi huyo ni Osward Mwinuka (58), aliyefariki dunia usiku wa kuamkia jana katika Hospitali ya Mkoa wa Iringa.

Dk Salim alisema hali za majeruhi wanne waliolazwa Hospitali ya Rufaa ya Iringa zinaendelea vizuri wakati wengine wanne hali zao siyo nzuri na wanatarajia kuwapa rufaa kwenda Hospitali ya Taifa ya Muhimbili (MNH).

Alisema maiti waliofikishwa hospitalini ni 27 na nane walitambuliwa na kuchukuliwa na ndugu zao wengi wao kutoka Mbeya.

Kamanda wa Polisi Mkoa wa Iringa, Ramadhani Mungi aliwataja waliotambuliwa kuwa ni Mbezi Deogratius, mkazi wa Soweto Mbeya, Editha Ngunangwa, mkazi wa Soweto, Mohamed Juma, mkazi wa Mbeya, Ndenya Sixbert, mkazi wa Mbeya, James Kinyamaguho, mkazi wa Morogoro, Said Halfan na Abuu Mangula.

Waliojeruhiwa ni Mustafa Ally, Dominic Shauri, Tito Kyando, Martin Haule, Ipyana Mbamba, Fadhil Kalenga, Mussa Mwasege, Nehemia Mbuji, Josam Abel, Tumpate Mwakapala, Nico Hamis na Esther William.

Wengine ni Peter Mwakanale, Kelvin Mwakaladi, Raphael Nerbot, Maga Sebastian, Catherine Mwijungu, Lucy Mtanga, Debora Vicent, Ester na mwanaume ambaye jina lake halikuweza kujulikana kutokana na kuwa katika hali mbaya.

MWANANCHI

Rais Jakaya Kikwete amesema Serikali itajenga nyumba 403 ambazo zimebomolewa na mvua kubwa iliyonyesha wiki iliyopita katika kijiji cha Mwakata wilayani Kahama na kusababisha watu 649 kukosa mahali pa kuishi.

Kauli hiyo aliitoa jana kwenye kijiji cha Mwakata baada ya kutembelea eneo lililoathiriwa na mvua hiyo na kujionea maisha duni wanayoishi watu hao.

Akizungumza na wananchi waliohudhuria mkutano wake Rais Kikwete alisema Serikali iko pamoja na wananchi hao na itahakikisha makazi yao yanarejea katika hali yake ya kawaida kwa kuwajengea nyumba hizo.

Pia, Rais Kikwete aliagiza Jeshi la Kujenga Taifa(JKT) wajenge nyumba hizo bila kupitia mkandarasi yeyote kama vile ulivyo ujenzi wa Serikali kwa kuwa ujenzi wa jeshi unaisha kwa muda mfupi na hakuna uchakachuaji

Aliwataka viongozi mkoani Shinyanga kuhakikisha ujenzi huo hautangazwi na kuagiza JKT kwenda kwenye eneo hilo kufanya tathmini ya ujenzi huo ili uanze mara moja.

Rais Kikwete aliwatoa wasiwasi wananchi wa Mwakata waliokumbwa na tatizo hilo kwamba Serikali itahakikisha wote wamepata chakula hadi mwisho watakapolima na kupata mavuno na tukio hilo wasilihusishe na imani za kishirikina.

Alisema mvua hizo ni za kawaida ambazo hutokana na mabadiliko ya tabia ya nchi na si ushirikina hivyo aliwataka wananchi hao waendelee kuwa na hisia hizo lakini wasilichukulie kwa uzito swala la ushirikina wakatafuta mchawi wa mvua hiyo

Awali, Mkuu wa Mkoa wa Shinyanga, Ally Rufunga alimwambia Rais Kikwete kwamba mvua hiyo licha ya kuua watu 47 pia imeharibu mazao hekari 2,332 pamoja na visima 53 vya maji ya kunywa.

Rufunga alisema mpaka kufikia sasa wahisani mbalimbali wamechangia kwenye tukio hilo Sh64 milioni pamoja na tani 63 za unga wa sembe pamoja na mahitaji mbalimbali ya kibinadamu yakiwamo mabati zaidi ya 1,000

NIPASHE

Serikali inakabiliwa na hali ngumu kifedha kiasi cha kushindwa kulipa madeni ya ndani yenye thamani ya Sh. trilioni 1.458.

Miongoni mwa wanaoidai fedha hizo ni watumishi wake, wazabuni, wakandarasi na watalaam washauri.

Madeni hayo yaliwasilishwa serikalini hadi Desemba 31, mwaka jana.

Akizungumza kwenye kikao cha Kamati ya Kudumu ya Bunge ya Bajeti ambacho kilihudhuriwa na maofisa wa Wizara ya Fedha wakiongozwa na Naibu Waziri wa wizara hiyo, Mwigulu Nchemba, Mwenyekiti wa Kamati hiyo, Dk. Festus Limbu alisema hadi wakati huo ni Sh. bilioni 286.92 tu ndizo zilizokuwa zimelipwa.

Kwa upande wake, Waziri Nchemba alisema Serikali bado inafanya tathmini ya deni halisi ambalo inadaiwa na itatoa taarifa ndani ya mwezi huu.

Aidha, Kamati hiyo iliijia juu Serikali baada ya kubaini kwamba haina nidhamu katika matumizi yake na imetumia Sh. trilioni 1.426 ambazo hazikuidhinishwa na Bunge.

Alisema matumizi hayo ni kinyume cha sheria na kwamba jambo ambalo serikali ilipaswa kufanya kabla ya kutumia fedha hizo ni kurudi bungeni kuomba bajeti ya ziada.

NIPASHE

Serikali  inapoteza zaidi ya Sh. bilioni tano za kodi kwa mwaka kutokana na mafuta yanayodaiwa kwenda nje kuchakachuliwa na kurudishwa nchini, hivyo kusababisha hasara kubwa.

Kadhalika, serikali kupitia Wizara ya Nishati na Madini, imetakiwa kuwasimamia  wafanyabiashara wa mafuta kuhakikisha haipati hasara katika mapato yake.

Kauli hiyo ilitolewa jana na Mwenyekiti wa Kamati ya Kudumu ya Bunge ya Nishati na Madini, Richard Ndasa, wakati akizungumza na waandishi wa habari  jijini Dar es Salaam.

Alisema mapato ya serikali kupitia mafuta yanapungua kutokana na Wizara ya Fedha kuwasiliana moja kwa moja na Mamlaka ya Mapato Tanzania (TRA) badala ya Wizara ya Nishati na Madini kinyume cha utaratibu.

“Mafuta yanayoingia nchini asilimia kubwa kumbukumbu zinaonyesha yanakwenda nje, lakini hayafiki kwa kuwa yanazunguka na kurudi kutumika ndani bila kulipiwa kodi na kuipotezea serikali zaidi ya Sh. bilioni tano kwa mwaka…lazima Wizara ya Nishati na Madini ishirikishwe,” alisema. Ndasa.

Akizungumzia kero ya mara kwa mara ya kukatika umeme, alisema kamati yake inataka kupata taarifa kutoka kwa Shirika la Umeme Tanzania (Tanesco) pamoja na matatizo ya ukosefu wa huduma ya mfumo wa Luku yanayoendelea nchini.

Naye Mkurugenzi Mtendaji Tanesco, Felchesmi Mramba, akizungumzia mfumo wa Luku, alisema matumizi ya huduma hiyo yameongezeka kutoka watu 300,000 hadi kufikia zaidi ya milioni moja.

NIPASHE

Wafungwa 14 waliohukumiwa adhabu ya kifo katika gereza la Isanga, mkoani Dodoma, wamelalamikia ucheleweshwaji wa nakala za hukumu za kesi zao kwa zaidi ya miaka mitano, hali inayowakwamisha  kukata rufaa.

Kwa mujibu wa taarifa ya wafungwa hao  ofisi ya Msajili wa Mahakama Kuu Kanda ya Mashariki imekuwa na ukiritimba katika utoaji wa nakala za hukumu za kesi na hivyo kushindwa kukata rufaa wakati  ni haki yao ya msingi.

Wafungwa hao (majina tunayahifadhi), walisema Kanda ya Mashariki imekuwa na tatizo katika kushughulikia  suala hilo ukilinganisha na Mahakama Kuu za kanda nyingine ambazo wafungwa wamekuwa wakipewa nakala za hukumu za kesi kwa ndani ya kipindi cha mwaka mmoja.

“Sisi wafungwa wa adhabu ya kifo wa gereza la Isanga Dodoma tunailalamikia kanda ya Mashariki hususan Msajili wa Mahakama Kuu Kanda ya Mashariki kwa kutucheweleshea milolongo na nakala za hukumu za kesi zetu kwa zaidi ya miaka mitano tofauti na kanda zingine zote ambazo hutoa nakala hizo ndani ya mwaka mmoja tu,” wameeleza katika taarifa yao.

Waliongeza kuwaa ucheleweshaji huo wa nakala za hukumu hupelekea kuchelewa kusikiliza rufani zao kwa zaidi ya miaka kumi tofauti na kanda zingine rufaa husikilizwa ndani ya miaka miwili tu.

“Baya zaidi maswahibu haya hutukumba sisi tusio na pesa, mnyonge mnyongeni, haki yake mpeni, haki inayocheleweshwa ni haki inayonyimwa, tunamuomba Mwanasheria Mkuu, Jaji Mkuu na Waziri wa Katiba na Sheria watutatulie kero hiyo kwani siyo wote tulio gerezani tuna makosa,” wameeleza.

Wafungwa wanaolalamikia suala hilo ni wale ambao walihukumiwa adhabu ya kifo kati mwaka 1992 ambao idadi yao ni mmoja, 2003 (mmoja), 2004 (mmoja), 2007 (mmoja), 2009 (wawili), 2010 (watatu), 2011 (watatu) na mwaka 2012 wapo wawili.

NIPASHE

Naibu Gavana wa Benki Kuu ya Tanzania (BoT), Juma Reli, amejikaanga kwenye Kamati ya Kudumu ya Bunge ya Hesabu za Serikali (PAC), akieleza kuwa benki hiyo haifahamu wala haijafuatilia taarifa za akaunti 99 zinazodaiwa kumilikiwa kinyemela na Watanzania kwenye akaunti za siri nchini Uswisi.

Aidha, Mamlaka ya Mapato Tanzania (TRA), imesema imeanza kuchunguza taarifa zilizotolewa na ripoti ya mtandao wa Swiss Leaks chini ya Waandishi wa Habari za Uchunguzi wa Kimataifa (ICIJ) iliyowataja vigogo 99 wenye akaunti za siri nchini Uswisi ili kubaini majina yao kwa nia ya kuwatoza kodi.

TRA imesema inakadiriwa kuwa takribani dola za Marekani milioni 328 (Sh. bilioni 574) zinapotea kutokana na utoroshwaji huo wa fedha.

Katika kikao hicho, majibu ya Naibu Gavana yalionyesha kuwakera wajumbe wa PAC ambao walimjia juu na kuhoji sababu za BoT kutofuatilia tuhuma hizo ilhali Serikali ya Uswiss ipo tayari kutoa ushirikiano.

Aliyeanza kumhoji Reli ni Mbunge wa Tabora Mjini, Ismail Aden Rage, ambaye alisema Septemba 24, 1998, BoT ilitoa waraka unaozuia Mtanzania kufungua akaunti nje ya nchi bila kibali.

Rage pia alihoji kama Watanzania wanafuata utaratibu huo na BoT imeshatoa vibali vingapi.

Akijibu, Reli alisema waraka huo bado upo lakini akasema watu binafsi hawaufuati kwa kuwa BoT haijawahi kupokea maombi ya watu binafsi kutaka vibali vya kufungua akaunti nje, licha ya kwamba wapo wanaomiliki akaunti kwa siri.

Alisema BoT imekuwa ikitoa vibali kwa kampuni za madini pekee, ambazo hata hivyo, taarifa za akaunti hizo haziwasilishwi TRA kwa ajili ya kukadiria kodi.

Majibu hayo yaliwakera wabunge na ndipo Mwenyekiti wa PAC,  Zitto Kabwe, alihoji kama kwa waraka huo, Watanzania wanaruhusiwa kufungua akaunti nje.

Swali hilo lilijibiwa na Katibu wa BoT ambaye pia ni Mwanasheria wa benki hiyo, Yusto Tongola, ambaye alisema kwa mujibu wa Sheria inayohusu ubadilishaji wa fedha za kigeni ya mwaka 1992, inatoa kibali kwa Mtanzania kufungua akaunti ya fedha za kigeni nchini, lakini siyo nje ya nchi.

HABARILEO

Kamati ya Kudumu ya Bunge ya Bajeti, imeibana Serikali kuhusu nidhamu ya matumizi ya fedha pamoja na mwenendo usioridhisha wa utekelezaji wa bajeti yake katika eneo la mapato na matumizi.

 Hatua hiyo ya Kamati ya Bunge imekuja baada ya kubaini kutokuwepo kwa nidhamu ya matumizi ya fedha za bajeti ambapo Serikali imekuwa ikitumia fedha nje ya bajeti bila kusubiri ziidhinishwe na Bunge.

Kamati hiyo ilibaini kuwa kiasi cha Sh trilioni 1.4 kimeombwa na Serikali nje ya bajeti kwa ajili ya shughuli maalum kama vile uchaguzi wa Serikali za Mitaa, uandikishaji wananchi katika daftari la kudumu la wapiga kura na uchaguzi mkuu unaotarajiwa kufanyika mwaka huu.

“Tume ya Uchaguzi ya Taifa (NEC) imeidhinishiwa kiasi cha Sh bilioni 2.8 kwa mwaka, lakini hadi mwisho wa nusu mwaka Sh bilioni 16.3 zimeshatolewa kwa shughuli za tume hiyo. Matumizi haya ni sawa na asilimia 1,148 ya fedha zilizotakiwa kutolewa hadi nusu ya kwanza na ni sawa na asilimia 574 ya bajeti ya mwaka mzima,” alisema Mwenyekiti wa kamati hiyo Festus Limbu.

Aliendelea kuhoji kuwa, “Je, ziada hii haikujulikana tangu awali? Mafungu mengine ya matumizi kama haya ni pamoja na msajili wa hazina, hali kama hii husababisha mafungu mengine kutopelekewa fedha kama ilivyoidhinishwa na Bunge.

” Kutokana na mapungufu hayo, kamati hiyo imeitaka Serikali katika mikakati yake na upangaji wa bajeti zijazo, kuhakikisha inaweka vipaumbele vinavyotekelezeka kulingana na mapato yake.